Brúarhlaup Selfoss var haldið síðastliðinn laugardag. Eitt HSK met var sett í hlaupinu en Magnús Jóhannsson, Frískum Flóamönnum, setti met í flokki 60-64 ára í 5 km götuhlaupi.
Magnús hljóp á 23:17 mín og stórbætti fimm ára gamalt HSK met Hannesar Stefánssonar, en metið var 26:15 mín.
Þess má geta að þetta er í fyrsta sinn sem Magnús setur HSK met en hann skellti sér í 5 km hlaupið að þessu sinni í tilefni af 25 ára hlaupaferli sínum. Hans fyrsta keppnisgötuhlaup var 5 km Brúarhlaup árið 1992.
Þátttaka í Brúarhlaupinu var heldur dræm að þessu sinni en aðeins tóku 111 hlauparar og 61 hjólreiðamaður þátt í hlaupinu. Keppt var í 2,8 km skemmtiskokki, 5 km hlaupi, 10 km hlaupi og 5 km hjólreiðum.
Í 2,8 km hlaupi sigraði Dagur Fannar Einarsson í karlaflokki á 9:14 mín og Jóhanna Elín Halldórsdóttir í kvennaflokki á 12:00 mín.
Í 5 km hlaupi sigraði Sigurjón Ernir Sturluson í karlaflokki á 16:54 mín og Helga Guðný Elíasdóttir í kvennaflokki á 19:41 mín.
Í 10 km hlaupi var Valur Þór Kristjánsson fyrsti karlinn í mark á 35:15 mín og Fríða Rún Þórðardóttir fyrsta konan á 38:50 mín.
Í hjólreiðum sigraði Arnar Hlynur Ómarsson annað árið í röð á 10:08 mín. Katrín Ágústsdóttir var fyrsta konan í mark á 13:00 mín.