Selfoss tók á móti Gróttu í úrvalsdeild kvenna í handbolta í Set höllinni í kvöld. Eftir æsispennandi lokakafla hafði Grótta nauman sigur, 25-26.
Jafnt var á flestum tölum fyrstu tuttugu mínúturnar en þá náði Grótta tveggja marka forskoti og staðan var 12-15 í hálfleik.
Grótta byrjaði betur í seinni hálfleik og jók forskotið í 6 mörk en Selfoss minnkaði fljótlega muninn í tvö mörk, 16-18. Gróttukonur voru skrefinu á undan í framhaldinu en lokamínúturnar urðu æsispennandi eftir að Selfoss jafnaði 23-23 þegar tvær og hálf mínúta voru eftir. Selfoss missti boltann í stöðunni 25-25 þegar sjö sekúndur voru eftir af leiknum og Grótta sigraði á flautumarki.
Hulda Dís Þrastardóttir var markahæst Selfyssinga með 6 mörk, Harpa Valey Gylfadóttir skoraði 5, Perla Ruth Albertsdóttir 5/4, Hulda Hrönn Bragadóttir og Eva Lind Tyrfingsdóttir 4 og Arna Kristín Einarsdóttir 1.
Selma Þóra Jóhannsdóttir varði 10 skot í marki Selfoss og var með 31% markvörslu og Dröfn Sveinsdóttir varði 2 skot og var með 33% markvörslu.
Grótta og Selfoss eru bæði með 2 stig eftir tvær umferðir.