Síðastliðinn laugardag undirrituðu fulltrúar Knattspyrnufélags Rangæinga og Stracta Hotels samning til fimm ára um nafnarétt á nýja gervigrasvellinum á Hellu. Völlurinn mun bera nafnið Stracta-völlurinn.
Tinna Erlingsdóttir, formaður KFR og Hreiðar Hermannsson, eigandi Stracta Hotels undirrituðu samninginn ásamt Eiríki Vilhelm Sigurðarsyni, sveitarstjóri Rangárþings ytra.
Samningurinn er mikil lyftistöng fyrir starf Knattspyrnufélags Rangæinga, en Stracta Hotels greiðir félaginu 20 milljónir króna í eingreiðslu fyrir fimm ára samningstímabil. Framlagið skapar félaginu aukið svigrúm til að efla starf sitt og halda áfram öflugri uppbyggingu knattspyrnunnar í Rangárvallasýslu.
Samningurinn byggir á samkomulagi Rangárþings ytra og KFR þar sem félaginu var veitt heimild til að selja nafnarétt að gervigrasvellinum í fjáröflunarskyni og rennur allur ágóði af sölu nafnsins til KFR. Samhliða heimildinni til sölu nafnaréttar var samið um að að minnsta kosti helmingur allra heimaleikja meistaraflokka KFR fari fram á Stracta-vellinum á Hellu.
