Síðastliðinn laugardag var í fyrsta sinn á Íslandi haldið júdómót í gólfglímu, Ne waza. Júdódeild Ungmennafélags Selfoss sendi ellefu keppendur til leiks á mótinu.
Í Ne waza byrja keppendur í gólfglímustöðu og hægt er að vinna með því að halda andstæðing sínum á bakinu. Keppendur 15 ára og eldri mega einnig vinna með hengingartaki eða armlásum.
Að sögn Einars Ottós Antonssonar, þjálfara hjá júdódeild Selfoss var mótið mjög vel heppnað og skemmtileg nýjung í júdóið á Íslandi en keppt var í aldursflokkum frá 11 ára og upp í fullorðinsflokk.
Meðal helstu úrslita má nefna að Egill Blöndal sigraði örugglega í -100 kg flokki karla og Styrmir Hjaltason sigraði í -81 kg flokki U21 árs og vann bronsverðlaun í fullorðinsflokki.