Hamar vann frábæran sigur á toppliði Álftaness í 4. deild karla í knattspyrnu á Grýluvelli í dag. Hamarsmenn urðu því fyrstir til að leggja Álftanes að velli í deildinni í sumar.
Guido Rancez kom Hamri yfir strax á 8. mínútu og Rodrigo Depetris bætti öðru marki við á 42. mínútu. Verðskulduð 2-0 forysta Hvergerðinga í hálfleik.
Seinni hálfleikurinn var spennandi og bæði lið áttu fínar sóknir áður en Depetris skoraði aftur á 83. mínútu og kom Hamri í 3-0. Álftnesingar áttu lokaorðið þegar þeir skoruðu í uppbótartímanum, en úrslitin voru ráðin, 3-1.
Hamar er áfram í 2. sæti deildarinnar, nú með 25 stig en Álftanes er í toppsætinu með 27 stig.