Hamar vann sinn fyrsta leik í 4. deild karla í knattspyrnu í sumar þegar liðið fékk KFS í heimsókn á Grýluvöll í Hveragerði.
KFS komst yfir á 14. mínútu eftir mark frá Sæbirni Jóhannssyni og staðan var 0-1 í hálfleik.
Hvergerðingar byrjuðu seinni hálfleikinn af miklum krafti og eftir þrettán mínútur höfðu Guido Rancez og Rodrigo Depetris skorað og komið Hamri í 2-1. Rancez innsiglaði svo 3-1 sigur Hamars á 75. mínútu.
Þrátt fyrir sigurinn eru Hamarsmenn límdir við botnsæti deildarinnar, með 6 stig. KFS er í hinu fallsætinu með 13 stig.