Fyrsti áfangi fjölnota íþróttahúss á Selfossi boðinn út í maí

Gísli bæjarstjóri (t.v.) og Viktor formaður skrifuðu undir yfirlýsinguna. Að baki þeim standa Guðbjörg Jónsdóttir, formaður íþrótta- og menningarnefndar og Tómas Ellert Tómasson, formaður framkvæmda- og veitustjórnar. Ljósmynd/Árborg

Á aðalfundi Ungmennafélags Selfoss á dögunum skrifuðu Gísli Halldór Halldórsson bæjarstjóri Árborgar og Viktor S. Pálsson formaður Umf. Selfoss undir viljayfirlýsingu um  uppbyggingu íþróttamannvirkja á Selfossvelli.

Þar kemur fram að uppbyggingin verði í samræmi við tillögur Alark arkitekta sem hafa verið lagðar fram til kynningar í bæjarstjórn Árborgar og aðalstjórn Ungmennafélags Selfoss.

Fyrsti áfangi uppbyggingarinnar felur í sér hálft yfirbyggt fjölnota íþróttahús með aðstöðu fyrir frjálsar íþróttir og knattspyrnu auk þess sem göngustígur liggur hringinn í kringum knattspyrnuvöllinn. Fram kom á aðalfundinum að stefnt er að því að bjóða fyrsta áfanga út í maí.

Í frétt frá ungmennafélaginu segir að það sé von beggja aðila að uppbyggingin muni ganga vel á næstu árum en þótt fyrsti áfangi sé kominn af stað eru aðilar meðvitaðir um að eftir er að tímasetja næstu áfanga en sú vinna verði unnin á næstu mánuðum og lögð fyrir bæjarstjórn haustið 2019.