Fimmta bikarmótið í þríþraut fór fram á Selfossi laugardaginn 12. ágúst við frábærar aðstæður á bæjarhátíðinni Sumar á Selfossi
Keppt var í sprettþraut með örlítið styttum vegalengdum; 750 m sundi, 18 km hjólreiðum og 4,6 km hlaupi, á flatri braut og góðir tímar náðust. Þetta er í fyrsta skipti sem keppt var í þríþraut á Selfossi og var öll framkvæmd til fyrirmyndar.
Í kvennaflokki sigraði Sara Árnadóttir á tímanum 67:04 mín. Önnur varð Kristín Laufey Steinadóttir einungis 21 sekúndu á eftir Söru en hún hafði örlítið forskot þegar hlaupið byrjaði. Þær eru báðar Selfyssingar og keppa báðar fyrir Sundfélagið Ægi. Ewa Przybyla úr Breiðablik varð þriðja á tímanum 71:33 mín. Sara tryggði sér jafnframt bikarmeistaratitil ÞRÍ þrátt fyrir að eitt bikarmót sé eftir.
Í karlaflokki sigraði Sigurður Örn Ragnarsson á tímanum 52:10 mín. Stefán Karl Sævarsson varð annar á tímanum 54:54 mín og Bjarni Jakob Gunnarsson varð þriði á tímanum 56:42 mín en þeir keppa allir fyrir Breiðablik.
Í byrjendaflokki sigruðu Selfyssingarnir Sif Sumarliðadóttir á tímanum 75:06 mín og Ægir Sigurðsson á tímanum 69:51 mín.
Breiðablik sigraði stigakeppni karla og Ægir sigraði stigakeppni kvenna og heildarstigakeppnina.