Selfoss 2 heimsótti ÍR í Breiðholtið í 1. deild karla í handbolta í kvöld. Eftir sigra í tveimur fyrstu leikjum liðsins í vetur lentu Selfyssingarnir ungu á vegg í kvöld og töpuðu 47-37.
ÍR hafði frumkvæðið nær allan leikinn en Selfyssingar voru ekki langt undan megnið af fyrri hálfleiknum. Staðan í leikhléi var 22-17.
ÍR byrjaði betur í seinni hálfleik og að tíu mínútum liðnum var munurinn orðinn 10 mörk, 30-20. Munurinn varð mestur fimmtán mörk í seinni hálfleik en Selfoss klóraði í bakkann undir lokin og að lokum skildu tíu mörk liðin að.
Aron Leo Guðmundsson var markahæstur Selfyssinga með 7 mörk, Arnar Gauti Þorkelsson skoraði 6, Ragnar Hilmarsson 5, Þorleifur Tryggvi Ólafsson 4, Dagbjartur Máni Björnsson, Kári Einarsson og Sveinn Ísak Hauksson 3, Bjarni Valur Bjarnason og Dagur Rafn Gíslason 2 og þeir Skarphéðinn Steinn Sveinsson og Bartosz Galeski skoruðu 1 mark hvor. Ísak Kristinn Jónsson varði 8 skot í marki Selfoss og Garðar Freyr Bergsson 1.
Selfoss 2 er í 3. sæti deildarinnar með 4 stig en ÍR er í 2. sæti með 6 stig.