Selfyssingar unnu góðan sigur á Fjölni í frábærum fótboltaleik í 2. deild karla í knattspyrnu í dag. Eftir spennandi lokakafla fagnaði Selfoss 2-3 sigri.
Liðin mættust í Egilshöllinni og Selfyssingar byrjuðu þar af miklum krafti. Þeim tókst þó ekki að koma boltanum í netið fyrr en á 32. mínútu þegar Frosti Brynjólfsson skoraði gott mark, hans fyrsta í sumar.
Staðan var 0-1 í hálfleik en aðeins voru liðnar fimm mínútur af seinni hálfleiknum þegar Viðar Örn Kjartansson tvöfaldaði forystu Selfyssinga. Þeir héldu Fjölnismönnum í heljargreipum og tíu mínútum síðar skoraði Frosti aftur, frábært mark, og kom Selfyssingum í 0-3.
Allt virtist stefna í öruggan sigur Selfyssinga en Fjölnismenn voru ekki á þeim buxunum að gefast upp. Þeir minnkuðu muninn í 2-3 með tveimur mörkum á þriggja mínútna kafla og þá voru enn tæpar tuttugu mínútur eftir af leiknum.
En Selfyssingar spiluðu skynsamlega úr stöðunni og hleyptu Fjölni ekki nær sér, lokatölur 2-3.
Selfyssingar eru nú í 2. sæti deildarinnar með 11 stig en Fjölnir er í 4. sætinu með 9 stig.