Jötunn Vélar hafa samið við hlaupahópinn Fríska Flóamenn um samstarf og fjárstuðning, en samningur þess efnis var undirritaður í húsakynnum Jötunn Véla við Austurveg á Selfossi á dögunum.
Um er að ræða fimm ára samning sem hefur það að markmiði að stuðla að aukinni hreyfingu og útivist almennings. Það verði m. a. gert með því að halda götuhlaup á Selfossi.
Hlaupið heitir Jötunnhlaupið og verður haldið í fyrsta sinn þann 1. maí næstkomandi. Í boði verða 5 og 10 km með tímatöku. Vegalengdir verða löglega mældar af mælingarmönnum Frjálsíþróttasambands Íslands.
Hefjast hlaupin og enda við verslun Jötunn Véla við Austurveg 69. Frískir Flóamenn munu sjá um kynningu, skipulagningu og framkvæmd hlaupsins í samvinnu við Jötunn Vélar, en fyrirtækið leggur til aðstöðu á hlaupadegi og fjárstuðning vegna kostnaðar við hlaupið.
Hlaupaæfingar Frískra Flóamanna eru á þriðjudögum og fimmtudögum kl. 17:15 og á laugardögum kl. 10, og æfingar eru jafnt fyrir byrjendur sem lengra komna.