Eins og sunnlenska.is hefur greint frá mun Landsmót UMFÍ 50+ árið 2027 fara fram á Hellu. Framkvæmdanefnd mótsins hefur verið skipuð og hélt hún sinn fyrsta fund í síðustu viku.
Nefndina skipa Guðmundur Jónasson, Guðríður Aadnegard, Anný Ingimarsdóttir og Guðrún Tryggvadóttir frá HSK, Ástþór Jón Ragnheiðarson og Ösp Viðarsdóttir frá Umf. Heklu, Ragnheiður Högnadóttir frá UMFÍ og Eiríkur Vilhelm Sigurðarson og Jóhann G. Jóhannsson frá Rangárþingi ytra.
Á fundinum var samþykkt að Guðmundur verði formaður nefndarinnar og Anný ritari. Nokkrar mögulegar dagsetningar voru ræddar fyrir mótið en að lokum var nefndin sammála um að mótið yrði haldið dagana 25. til 27. júní 2027.
Á fundinum var rætt um þau verkefni sem nefndin þarf að vinna að á næstu mánuðum. Þar má nefna kynningarmál í tengslum við Landsmótið á Hrafnagili í sumar, keppnisgreinar og samtal við fyrirtæki á svæðinu varðandi mögulegt samstarf og stuðning við mótið.