Þrjár eyfellskar systur hafa náð eftirtektarverðum árangri í kraftlyftingum. Hulda, Sigríður og María Sigurjónsdætur ólust upp í Mið-Mörk undir Eyjafjöllum þar sem íþróttaáhuginn kviknaði snemma.
Frá bernskuleikjum til heimsmeistaramóta
Þegar systurnar voru litlar fylgdust þær af miklum áhuga með íþróttum í sjónvarpinu. Þegar útsendingunum lauk tóku þær sjálfar til við að leika íþróttafólkið á skjánum og kepptu hver við aðra. Þá hefur þær varla grunað að þær ættu síðar eftir að keppa á alþjóðlegum stórmótum fyrir Íslands hönd.
Systurnar þakka árangur sinn meðal annars sveitastörfum í uppvextinum og íþróttaiðkun á æskuárunum. Þar telja þær að lagður hafi verið grunnur að styrk, úthaldi og keppnisskapi.
Þrjár systur á móti í Rúmeníu
Í nóvember 2025 kepptu systurnar allar á Special Olympics í kraftlyftingum í Rúmeníu og náðu þar góðum árangri.
Hulda náði fyrsta sæti samanlagt. Hún lyfti 120 kg í hnébeygju (2. sæti), 75 kg í bekkpressu (1. sæti og persónulegt met) og 132,5 kg í réttstöðulyftu (1. sæti og persónulegt met).
Sigríður varð önnur samanlagt. Hún lyfti 122 kg í hnébeygju (1. sæti og persónulegt met), 75 kg í bekkpressu (2. sæti og persónulegt met) og 125 kg í réttstöðulyftu (2. sæti).
María varð fjórða samanlagt. Hún lyfti 92,5 kg í hnébeygju (3. sæti og persónulegt met), 50 kg í bekkpressu (4. sæti) og 110 kg í réttstöðulyftu (4. sæti).
Hulda með 50 Íslandsmet
Hulda á að baki 25 ára keppnisferil í frjálsum íþróttum og kraftlyftingum. Hún hefur sett 50 Íslandsmet í frjálsum íþróttum, auk fjölda meta í kraftlyftingum. Hún hefur unnið heimsmeistaratitil í kraftlyftingum og silfurverðlaun á öðru heimsmeistaramóti og á Evrópumóti í bekkpressu.
Í frjálsum íþróttum hefur hún keppt á fjórum Evrópumótum, einu heimsmeistaramóti og tvennum Global Games. Hún hefur meðal annars náð 4. sæti á Global Games, 10. sæti á heimsmeistaramóti og bronsverðlaunum í kringlukasti á Virtus Evrópuleikum. Á Bikarmeistaramóti Íslands 2026 varð hún fimmta í kúluvarpi.
Sigríður margfaldur verðlaunahafi
Sigríður náði fyrsta sæti á heimsmeistaramóti Special Olympics á Íslandi árið 2024, öðru sæti í Rúmeníu árið 2025 og fyrsta sæti á móti í bekkpressu í Litháen árið 2026. Hún varð Íslandsmeistari ÍF árið 2025 og hefur unnið til fjölda annarra verðlauna á Íslandsmeistaramótum og bekkpressumótum Krafts.
María fjarri góðu gamni um sinn
María hefur einnig keppt með góðum árangri á alþjóðavettvangi. Hún er um þessar mundir frá keppni vegna axlarmeiðsla.
Nýjar áskoranir og stuðningur
Hulda og Sigríður stefna á heimsmeistaramót í kraftlyftingum í Istanbúl í nóvember 2026. Árið 2027 stefnir Sigríður á heimsleika Special Olympics í Chile í október og Hulda á Global Games í Egyptalandi í nóvember.
Þátttaka á alþjóðlegum stórmótum er kostnaðarsöm og þurfa systurnar sjálfar að standa straum af útgjöldum vegna keppnisferða sinna. Þær eru því afar þakklátar fyrir allan stuðning, hvort sem hann kemur frá fyrirtækjum eða einstaklingum. Hver styrkur, stór sem smár, skiptir máli og hjálpar þeim að halda áfram að keppa meðal þeirra bestu.
Til að afla fjár fyrir komandi keppnisferðum verður einnig efnt til happdrættis og eru framlög fyrirtækja í formi happdrættisvinninga vel þegin. Dregið verður úr happdrættinu í beinni útsendingu í Facebook-hópnum Sterku systurnar.
Hægt er að styrkja systurnar með því að leggja inn á eftirfarandi reikning:
Reikningsnúmer: 0123-15-148097
Kennitala: 311283-2439
Fylgjast má með afrekum systranna, undirbúningi þeirra fyrir næstu stórmót og fréttum af happdrættinu í Facebook-hópnum Sterku systurnar.
Systurnar og aðstandendur þeirra vilja koma á framfæri innilegum þökkum til allra sem hafa lagt þeim lið og þeirra sem vilja styðja þær í þeim spennandi verkefnum sem fram undan eru.
