Það verður sannkölluð fótboltaveisla á JÁVERK-vellinum næstkomandi laugardag þegar Selfoss tekur á móti KFG í lokaumferð 2. deildar karla í knattspyrnu.
Selfyssingar geta tryggt sér sæti í 1. deildinni að ári og því skiptir stuðningurinn úr stúkunni öllu máli.
„Við ætlum að hita vel upp fyrir leik með fótboltahátíð fyrir alla fjölskylduna – og veðurspáin lofar góðu!“ segir í tilkynningu frá Selfyssingum.
Dagskráin hefst kl. 12:45 á vellinum. Huppu-ísbíllinn mætir á svæðið og boðið verður upp á knattþrautir fyrir börnin. Þá ætlar Domino’s að bjóða yngri kynslóðinni upp á pizzur. Óli Stefán, þjálfari karlaliðsins, fer yfir liðið og leikskipulagið í Tíbrá áður en Jón Daði Böðvarsson verður heiðraður rétt fyrir leik á JÁVERK-vellinum. Happdrætti verður einnig á staðnum með glæsilegum vinningum! Leikurinn hefst svo kl. 14:00.
„Nú þurfum við alla Selfyssinga á völlinn!“ segir í tilkynningunni þar sem fólk er hvatt til að taka fjölskylduna með og mæta snemma. Gengið er inn um aðalinngang vallarins við Engjaveg og ekki væri verra ef fólk væri búið að ganga frá miðakaupum hér.