Daníel Kolbeinsson úr Golfklúbbi Kópavogs og Garðabæjar gerði sér lítið fyrir og fór holu í höggi á 3. holu Svarfhólsvallar á Selfossi síðastliðinn laugardag.
Þriðja holan er par 4, 316 metra löng af gulum teigum, svo Daníel fékk því albatross, sem er afar sjaldgæft í golfi.
Það var kröftugur hliðarmeðvindur og Daníel sá því tækifæri til að reyna að komast inn á flötina og tók því upp driverinn.
„Til þess að komast inn á flötina þurfti boltinn að fljúga um 250 metra yfir ána. Ég smellhitti boltann en við vorum ekki alveg vissir um hvort hann hefði komist yfir. Þegar nær dró holunni fundum við hann hvergi og ég spilaði því öðrum bolta,“ segir Daníel í samtali við sunnlenska.is.
„Þegar komið var inn á flötina og félagi minn var að ljúka við sitt pútt kom hann skyndilega auga á bolta neðst í holunni. Ég spurði strax: „Hvernig bolta?“ Hann svaraði: „Kirkland 2.“ Þá hljóp ég í geðshræringu yfir alla flötina og áttaði mig loks á því að ég hafði farið holu í höggi á par 4 holu,“ segir Daníel ennfremur og bætir við að draumahöggið hafi gert golfhringinn miklu betri.
„Já, höggið setti svo sannarlega svip sinn á það sem eftir lifði hringsins og ég hélt áfram að spila frábært golf. Ég mun aldrei gleyma þessu höggi og það verður gaman að geta sagt börnum og barnabörnum frá því um ókomna tíð!“ sagði Daníel að lokum.
