Fjörugt jólamót í taekwondo

HSK-mótið í taekwondo fór fram í íþróttahúsinu Iðu Selfossi fyrir skömmu. Keppendur á mótinu voru á fimmta tuginn, flestir frá Umf. Selfoss en einnig voru keppendur frá Umf. Heklu, Umf. Stokkseyrar og Þór Þorlákshöfn.

Keppt var í poomsae (formi ), MUYE ( sem er Taekwondosýning t.d. brot á spýtum og múrsteinum), Sparring (bardaga) og þrautabraut. Mikil og góð stemning skapaðist, sérstaklega í þrautarbrautarkeppninni þar sem mikið var sprellað og keppni hörð.

HSK-mótin, sem hafa verið í umsjá Taekwondodeildar Umf. Selfoss undanfarin ár, hafa vaxið ár frá ári og eru að verða fastur punktur í starfsemi deildarinnar. Ríkir jafnan mikil eftirvænting fyrir þetta mót ár hvert.

Stjórn og þjálfarar Taekwondodeildar Ungmennafélags Selfoss þakkar öllum keppendum drengilega keppni og öllum gestum og velunnurum fyrir komuna á þetta skemmtilega mót.