Stokkseyri vann sinn fjórða sigur í röð í 5. deild karla í knattspyrnu þegar liðið heimsótti KM á gervigrasið við Kórinn í Kópavogi í dag.
KM var á undan að skora, þeir komust yfir á 28. mínútu en Marteinn Maríus Marinósson nýtti markamínútuna, þá 43., til þess að jafna metin fyrir Stokkseyringa og staðan var 1-1 í hálfleik.
Arilíus Óskarsson kom Stokkseyri í 1-2 þegar tíu mínútur voru liðnar af seinni hálfleiknum og hlutirnir farnir að líta vel út fyrir Stokkseyringa. KM fékk tækifæri til þess að koma sér inn í leikinn aftur um miðjan seinni hálfleikinn þegar þeir fengu vítaspyrnu en Garðar Freyr Bergsson, markvörður Stokkseyrar, gerði sér lítið fyrir og varði spyrnuna.
KM missti mann af velli með sitt annað gula spjald þegar tuttugu mínútur voru eftir og þjálfari liðsins fór sömu leið á sama tíma. Manni fleiri áttu Stokkseyringar ekki í neinum vandræðum með að landa sigri og Hafþór Berg Ríkharðsson innsiglaði 1-3 sigur þegar fimm mínútur voru eftir.
Stokkseyri er með 13 stig í toppsæti B-riðilsins, einu stigi á undan Hömrunum sem eiga leik til góða.