Þeir Reynir Arnar Ingólfsson, Jón Ingi Guðfinnsson, Matthías Máni Elíasson og Eðvald Huginn Hólmarsson hafa verið valdir í knattspyrnulið Íslands sem keppir á Genuine Cup í Houston í Bandaríkjunum í lok júlí.
Alls voru fjórtán íþróttamenn, bæði karlar og konur, valdir í íslenska liðið og þetta er því mikill heiður fyrir leikmennina sem hafa lagt hart að sér á æfingum og keppni með Selfossi/Suðra.
Yfir 1.000 keppendur verða á mótinu og verða þátttöku þjóðirnar fimmtíu talsins.
Genuine Cup er mót fyrir fatlað fótboltafólk og er liður í starfi Genuine Foundation við að efla inngildingu og skapa fleiri tækifæri með íþróttum. Mótið snýst um mun meira en bara fótbolta, það er vettvangur fyrir sýnileika, tækifæri og þátttöku á alþjóðlegum vettvangi.