Fjóla fékk brons í Svíþjóð

Fjóla Signý Hannesdóttir, Umf. Selfoss, keppti um helgina á Sayo-mótinu í Stokkhólmi í Svíþjóð. Fjóla hljóp bæði 100 m og 400 m grindarhlaup, en 100 metrana fór hún á 15,03 sekúndum, sem er hennar besti tími í ár.

Hún var aðeins 3/100 úr sekúndu frá því að komast í úrslit og endaði því í 9. sæti.

Í 400 m grindarhlaupið hljóp Fjóla á 64,23 sekúndum og endaði í þriðja sæti. Þetta var fyrsta 400 m grindarhlaup Fjólu í ár og má því segja að þetta hafi verið ágætis byrjun hjá henni, en hún er að koma til baka eftir löng og erfið meiðsli.

Keppnistímabilið í frjálsum íþróttum er rétt að byrja og segir Fjóla því mikið rými fyrir bætingar, enda mörg mót eftir í sumar.