Selfoss tapaði með átta mörkum þegar liðið heimsótti Val í N1-deild kvenna í handbolta í kvöld. Lokatölur að Hlíðarenda voru 30-22.
Valskonur voru sterkari í fyrri hálfleik minnugar þess að þær brenndu sig á Selfossliðinu í bikarleiknum fyrr í mánuðinum. Staðan í leikhléinu var 14-8.
Selfyssingar bættu í í seinni hálfleik en Valskonur höfðu áfram yfirhöndina og unnu að lokum átta marka sigur, 30-22.
Hrafnhildur Hanna Þrastardóttir var markahæst Selfyssinga með 7 mörk, Carmen Palamariu skoraði 4, Thelma Sif Kristjánsdóttir 3, Kara Rún Árnadóttir, Tinna Soffía Traustadóttir og Þuríður Guðjónsdóttir skoruðu allar 2 mörk og þær Hildur Einarsdóttir og Kristrún Steinþórsdóttir skoruðu sitt markið hvor.