Fimm „nýir“ leikmenn til Selfoss

Undanfarið hafa fimm nýir leikmenn bæst inn í æfingarhóp karlaliðs Selfoss í handbolta. Allir eiga þeir sameiginlegt að hafa komið upp úr unglingastarfinu á Selfossi.

Þetta eru þeir Gústaf Lilliendahl, Andri Már Sveinsson, Hörður Másson, Sigurður Már Guðmundsson og Örn Þrastarson.

Gústaf þarf ekki að kynna fyrir aðdáendum Selfossliðsins, en hann spilar alltaf með hjartanu, góður skotmaður og erfiður við að eiga í sókninni inni á línunni. Hann á fjölmarga leiki fyrir Selfoss undir beltinu síðustu ár en Gústaf lék með Fylki fyrir áramót og gerði Selfyssingum margar skráveifur í fyrri hálfleik í viðureign liðanna á Selfossi í vetur.

Andri Már er vinstri hornamaður sem hefur ekki spilað síðan í desember 2011. Hann hefur slitið krossband á báðum hnjám á ferlinum en er óðum að komast í betra stand.

Hörður Másson kom inn í æfingahópinn þegar Atli Kristinsson meiddist fyrr í vetur en hann lék síðast með HK árið 2011. Sjóli, eins og hann er oft kallaður, er að komast í betra stand og skotin eru að verða fastari og hann á eftir að nýtast Selfyssingum vel á lokasprettinum í vetur. Hann er mjög öflug skytta en einnig sterkur varnarmaður sem getur leikið bæði í bakverði og miðverði.

Sigurður Már Guðmundsson er vinstri skytta og miðjumaður, afar sterkur varnarmaður sem getur leikið hvar sem er í vörninni. Sigurður á eftir að auka breiddina í spili liðsins til muna og létta á útispilurum þeim sem fyrir eru.

Leikstjórnandinn Örn Þrastarson hefur verið frá keppni afar lengi en með dugnaði og þrautseigju hefur hann náð að leika nokkra æfingaleiki með liðinu nú í janúar. Örn hefur slitið krossband tvisvar á sama hné, vonandi eru slík meiðlsi að baki og er hann að vinna í því að koma sér í stand.

Arnar Gunnarsson, þjálfari Selfoss, segir frábært að fá þessa leikmenn inn í hópinn. „Allir auka þeir gæði æfinga og eru staðráðnir í að koma sér í leikhæft ástand og vinna sér þannig inn leiktíma. Endurkoma þeirra leiðir til þess að mun meiri keppni er komin í allt sem við gerum á æfingum. Leikmenn berjast meira en áður, spila fastari vörn og samkeppni er þar af leiðir orðin mun meiri. Allt þetta bætir leikmenn okkar sem og liðið í heild,“ sagði Arnar í samtali við sunnlenska.is.

„Þessir fimm drengir eru líka allir frábærir að hafa í hóp og sannir félagsmenn og ekki skemmir fyrir að allir koma þeir úr starfinu hér á Selfossi. Þeir eru þó mislangt komnir hver á sinni leið en það er ósk okkar allra að það komi sem fyrst allt er líða fer á árið og er ég sannfærður um það gerist,“ sagði Arnar ennfremur.