KFR vann ótrúlegan sigur á Höfnum í 4. deild karla í knattspyrnu í dag og tryggði sér um leið áframhaldandi veru í deildinni á næstu leiktíð.
Það blés ekki byrlega hjá Rangæingum í upphafi því Hafnir, sem eru í bullandi fallbaráttu, komust í 0-3 á fyrsta hálftímanum. Helgi Valur Smárason rétti hlut KFR á 44. mínútu með marki úr vítaspyrnu og staðan var 1-3 í hálfleik.
Í seinni hálfleiknum lék KFR hins vegar á als oddi og gamli maðurinn, Hjörvar Sigurðsson, sá til þess að þeir fögnuðu sigri. Bjarni Þorvaldsson minnkaði muninn á 56. mínútu og svo var komið að varamanninum Hjörvari sem skoraði tvö mörk á sex mínútum og kom KFR í 4-3 þegar tíu mínútur voru eftir. Þórður Kalman Friðriksson innsiglaði svo 5-3 sigur KFR skömmu síðar.
KFR er nú á auðum sjó í 6. sæti deildarinnar með 18 stig en Hafnir eru enn í fallsæti, liðið situr í 9. sæti með 10 stig.