Selfyssingar velgdu FH-ingum svo sannarlega undir uggum þegar liðin mættust í úrvalsdeild karla í handbolta í Hafnarfirði í kvöld. Selfoss leiddi stærstan hluta leiksins en FH-ingar voru sterkari á lokasprettinum og sigruðu að lokum 33-30.
FH skoraði fyrstu tvö mörk leiksins en Selfoss jafnaði 2-2 og eftir það var jafnt á öllum tölum næstu tuttugu mínúturnar. Selfoss var skrefinu á undan á lokamínútum fyrri hálfleiks og þeir leiddu 12-15 í hálfleik.
Selfoss hafði frumkvæðið nær allan seinni hálfleikinn, allt þar til sjö mínútur voru eftir en þá fóru hlutirnir að falla með FH-ingum. FH komst yfir, 28-27, þegar rúmar fjórar mínútur voru eftir og Selfyssingar náðu ekki að svara fyrir sig eftir það.
Hannes Höskuldsson var markahæstur Selfyssinga með 9/3 mörk, Gunnar Kári Bragason skoraði 6, Sölvi Svavarsson 4, Tryggvi Sigurberg Traustason 3, Valdimar Örn Ingvarsson, Jónas Karl Gunnlaugsson og Anton Breki Hjaltason 2 og þeir Elvar Elí Hallgrímsson og Jason Dagur Þórisson skoruðu 1 mark hvor.
Markverðir Selfoss áttu stórleik í kvöld og Alexander Hrafnkelsson var besti maður vallarins. Hann varði 21 skot og var með 43% markvörslu og Philipp Seidemann varði 2/2 skot og var með 50% markvörslu.
Selfoss er í 8. sæti deildarinnar með 11 stig en FH er í 2. sæti með 25 stig.