Selfoss tók á móti FH í úrvalsdeild karla í handbolta í Set-höllinni Iðu í gærkvöldi. FH-ingar reyndust sterkari og þeir unnu öruggan sigur, 31-36.
Það var jafnt á öllum tölum fyrstu tólf mínúturnar en þá skoraði FH fimm mörk í röð og breytti stöðunni í 8-13. Munurinn varð mestur sex mörk og staðan í hálfleik var 15-21.
Sigur FH-inga var aldrei í hættu í seinni hálfleiknum, þeir náðu mest átta marka forskoti en Selfoss náði að klóra aðeins í bakkann á lokakaflanum.
Hákon Garri Gestsson var markahæstur Selfyssinga með 7/1 mörk, Tryggvi Sigurberg Traustason skoraði 6/3, Anton Breki Hjaltason og Valdimar Örn Ingvarsson 4, Jónas Karl Gunnlaugsson 3, Sveinn Ísak Hauksson og Aron Leo Guðmundsson 2 og þeir Haukur Páll Hallgrímsson, Dagur Rafn Gíslason og markvörðurinn Alexander Hrafnkelsson skoruðu allir 1 mark. Alexander átti góðan leik í markinu, varði 19 skot og var með 35% markvörslu.
Selfoss er í neðsta sæti deildarinnar með 1 stig en FH er í 4. sætinu með 7 stig.