Ægismenn gripu ekki síðasta hálmstráið þegar Völsungur kom í heimsókn í Þorlákshöfn í uppgjöri botnliða 1. deildar karla í knttspyrnu í kvöld. Leiknum lauk með 0-2 sigri gestanna og ekkert annað en fall blasir við Ægismönnum.
Það var fátt að frétta fyrstu tuttugu mínútur leiksins en bæði lið höfðu þó fengið ágætis færi. Völsungur komst síðan yfir á 26. mínútu eftir snarpa sókn og reyndist það eina mark fyrri hálfleiks.
Leikurinn var galopinn á upphafsmínútum síðari hálfleiks og bæði lið hefðu getað skorað en þegar rúmt korter var liðið tvöfölduðu Völsungar forystuna uppúr hornspyrnu.
Ægismenn reyndu að færa sig framar á völlinn í kjölfarið en varð ekkert ágengt og smám saman fjaraði leikurinn út.
Ægir er í botnsæti deildarinnar með 8 stig þegar fjórar umferðir eru eftir. Þeir þurfa að vinna síðustu fjóra leikina til að bjarga sér frá falli og treysta um leið á að ÍR, Grindavík eða Völsungur misstigi sig illilega á sama tíma.