Færri naktir útlendingar í brautinni

Keppendur í 100 km hlaupinu 2019 leggja í hann. Ljósmynd/Magnús Stefán Sigurðsson

Utanvegahlaupið Hengill Ultra Trail verður haldið í Henglinum í ár eins og síðustu ár. Hlaupið hefur nú fengið nafnið Salomon Hengill Ultra og hefur tímasetningu þess verið breytt og fer það nú fram helgina 5.-6. júní næstkomandi.

Vegna COVID-19 hafa skipuleggjendur ákveðið að gera breytingar á ræsingu, uppsetningu verðlaunaafhendingar og þá verður ræst í hollum og flögutími látin gildi en ekki tími hópræsingar.

Þetta er að sjálfsögðu gert til að koma til móts við nýjan veruleika og til að fara eftir þeim reglum sem gilda um samkomur og samneyti þá helgi sem keppnin fer fram. Tveggja metra reglan verður virt og stærð ræsingar á hverri vegalengd fyrir sig innan leyfilegra marka þannig að auðvelt verður að fara eftir hámarksfjölda á hverjum stað á hverjum tíma.

Góðu fréttirnar eru hinsvegar þær að naktir útlendingar verða færri í brautinni í ár ef fer sem horfir með samgöngur á milli landa, segir í tilkynningu frá mótshöldurum, og er þar væntanlega verið að vísa í ferðamannastrauminn sem liggur að læknum uppi í Reykjadal.

Eins og áður verður boðið upp á fimm vegalengdir, lengsta hlaupið er 100 km en það stysta 5 km. Einnig verður boðið upp á 4×25 km boðhlaup. Til að koma til móts við þátttakendur á þessum skrítnu tímum verður boðið upp á 20% afslátt af skráningargjaldi til 4. maí með því að skrá afsláttarkóðann sigrumc19 inn í þar til gert svæði í skráningarferlinu.

Salomon Hengill Ultra er hluti af mótaröðinni Víkingar sem samanstendur einnig af KIA Gullhringnum 11. júlí, Landsnet 32 fjallhjólakeppni í ágúst og svo Eldslóðinni sem er 28 km/10 km/5 km utanvegahlaup sem fram fer laugardaginn 5. september. Hlaupaleiðin í Eldslóðinni liggur um Vífilstaði, Vífilstaðavatn, Búrfellsgjá og Helgafell.

SKRÁNING Í ÖLL MÓTIN Í MÓTARÖÐINNI VÍKINGAR OG ALLAR UPPLÝSINGAR