Selfoss heimsótti ÍBV til Vestmannaeyja í úrvalsdeild karla í handbolta í dag og var ekki um neina frægðarför þeirra vínrauðu að ræða. ÍBV sigraði 40-28.
ÍBV var skrefinu á undan frá fyrstu mínútu og Eyjamenn juku forskot sitt jafnt og þétt í fyrri hálfleik. Munurinn varð mestur átta mörk en Selfoss náði að klóra í bakkann í lokin og staðan var 18-11 í hálfleik.
Eyjamenn skoruðu fyrstu þrjú mörkin í seinni hálfleik og þá má segja að úrslitin hafi verið ráðin. Munurinn hélst um og yfir tíu mörk og sjómannssynirnir í Vestmannaeyjum héldu fast um stýrið. Forskot þeirra jókst enn frekar á lokakaflanum og Selfyssingar áttu engin svör.
Gunnar Kári Bragason var markahæstur Selfyssinga með 5 mörk úr 5 skotum, Tryggvi Sigurberg Traustason skoraði 5/1, Sölvi Svavarsson 4, Hákon Garri Gestsson og Guðjón Baldur Ómarsson 3, Hannes Höskuldsson 3/1, Valdimar Örn Ingvarsson og Anton Breki Hjaltason 2 og Árni Ísleifsson 1.
Alexander Hrafnkelsson varði 11 skot í marki Selfoss og var með 27% markvörslu og Philipp Seidemann varði 1/1 skot og var með 11% markvörslu.
Selfoss er í 10. sæti deildarinnar með 9 stig en ÍBV er í 6. sæti með 19 stig.