Selfoss heimsótti ÍBV í úrvalsdeild kvenna í handbolta til Vestmannaeyja í dag. Eyjakonur sigruðu 36-34 eftir hörkuleik.
Staðan var 4-4 eftir sex mínútu en þá tók ÍBV á rás og náði fjögurra marka forskoti. Selfoss svaraði fyrir sig og jafnaði 15-15 þegar rúmar 22 mínútur voru liðnar en staðan var 18-18 í hálfleik.
ÍBV byrjaði betur í seinni hálfleiknum og forskot þeirra var komið í fimm mörk eftir rúmar átta mínútur. Selfoss náði ekki að spyrna á móti og sigur ÍBV var aldrei í hættu. Munurinn var enn fimm mörk þegar rúmar fjórar mínútur voru eftir en Selfoss skoraði síðustu þrjú mörk leiksins og minnkaði muninn í tvö mörk.
Perla Ruth Albertsdóttir skoraði 9 mörk fyrir Selfoss, Harpa Valey Gylfadóttir og Hulda Hrönn Bragadóttir 6, Emelía Ósk Aðalsteinsdóttir 4, Eva Lind Tyrfingsdóttir og Hulda Dís Þrastardóttir 3, Sylvía Bjarnadóttir 2 og Arna Kristín Einarsdóttir 1.
Selfoss er í 6. sæti deildarinnar með 2 stig en ÍBV er í 4. sæti með 4 stig.