Eva María Baldursdóttir, Umf. Selfoss, sigraði glæsilega í hástökki á Penn Classic háskólamótinu í Fíladelfíu í Bandaríkjunum um helgina.
Eva María, sem keppir fyrir University of Pittsburgh, stökk yfir 1,80 m og setti um leið nýtt mótsmet. Hún jafnaði þar með sinn besta árangur innanhúss en hún hefur hæst stokkið 1,84 m utanhúss.
Þetta var annar sigurinn í röð hjá Evu Maríu á þessu innanhússtímabili en eftir tvær vikur keppir hún á ACC meistaramótinu og freistar þess þar að bæta sig og ná árangri til að komast inn á lokamótið innnahúss. Sextán bestu hástökkvarar úr öllum háskólum Bandaríkjanna komast inn á lokamótið.
