Selfyssingurinn Eva María Baldursdóttir er komin í stórmótahóp Frjálsíþróttasambands Íslands.
Á Vormóti UMSB þann 2. júní síðastliðinn stökk hún 1,75 m í hástökki en lágmark í stórmótahópinn í hennar aldursflokki, 16-17 ára, er 1,73 m.
Stórmótahópur FRÍ er fyrir iðkendur á aldrinum 16-22 ára þar sem markmiðið er að styðja við framtíðarafreksmenn Íslands sem eru að stíga sín fyrstu skref á alþjóðlegum stórmótum í unglinga- og ungmennaflokki og þjálfara þeirra. Stuðningurinn snýr að því að aðstoða keppnismanninn við að móta andlegan/líkamlegan styrk, fyrirbyggja meiðsli auk almenns undirbúnings fyrir þátttöku í stórmótum og fleira.
Eva María er fyrsti fulltrúi frjálsíþróttadeildar Selfoss til að ná lágmarki í hópinn og þar á bæ eru menn og konur virkilega stolt af árangri hennar sem er öðrum iðkendum deildarinnar mikil hvatning.
Eva María keppir á Gautaborgarleikunum í hástökki um næstu helgi og verður spennandi að sjá hana spreyta sig þar við aðra góða hástökkvara.