Knattspyrnukonan Eva Lind Elíasdóttir var útnefnd Íþróttamaður sveitarfélagsins Ölfuss við athöfn í Versölum í gær.
Eva Lind er lykilleikmaður með meistaraflokki Selfoss í knattspyrnu sem varð í 4. sæti í Pepsi-deildinni í sumar og spilaði til úrslita í bikarkeppni KSÍ. Eva lék 14 leiki með liðinu og skoraði 4 mörk. Hún var einnig valin í æfingahóp U- 19 landslið Íslands sem lék á æfingamóti í Austurríki á síðasta sumri.
Eva Lind lét ekki þar við sitja heldur varð hún einnig Íslandsmeistari í kúluvarpi 18-19 ára innanhúss með kast upp á 11,99 m.
Tíu íþróttamenn voru tilnefndir í kjörinu en þeir voru auk Evu Lindar þau Axel Örn Sæmundsson fyrir badminton, Birta Óskarsdóttir fyrir fimleika, Eggert Helgason fyrir hestaíþróttir, Emil Karel Einarsson fyrir körfuknattleik, Heiðar Örn Sverrisson fyrir akstursíþróttir, Katrín Stefánsdóttir fyrir hestaíþróttir, Styrmir Dan Steinunnarson fyrir frjálsaríþróttir, Svanur Jónsson fyrir golf og Þorkell Þráinsson fyrir knattspyrnu.
Á verðlaunaafhendingunni í gær fengu eftirfarandi einnig viðurkenningu:
Dagrún Inga Jónsdóttir, Daníela Stefánsdóttir og Jenný Lovísa Benediktsdóttir fyrir að vera Íslandsmeistarar í 7. flokki í körfuknattleik með liði Umf. Njarðvíkur.
Halldór Garðar Hermannsson, Jón Jökull Þráinsson, Matthías Orri Elíasson og Magnús Breki Þórðarson fyrir að vera Íslands- og bikarmeistarar í 11. flokki í körfuknattleik með sameiginlegu liði Umf. Þórs/Umf. Grindavík.
Fannar Yngvi Rafnarson og Sólveig Þóra Þorsteinsdóttir fyrir Íslandsmeistaratitla í frjálsum íþróttum.
Glódís Rún Sigurðardóttir fyrir Íslandsmeistaratitla í hestaíþróttum og Arnar Bjarki Sigurðarson fyrir þátttöku með landsliði Íslands á Norðurlandamóti í Herning í Danmörku.