Aðalfundur Þjótanda var haldinn í Félagslundi síðastliðið fimmtudagskvöld. Þar var Erlín Katla Hansdóttir, Íslandsmethafi í hreystigreip í Skólahreysti, útnefnd íþróttamaður ársins hjá félaginu og Alda Stefánsdóttir var valin félagi ársins.
Nokkrar breytingar urðu á stjórninni en Bryndís Eva Óskarsdóttir lét af formennsku og var kosin formaður íþróttanefndar en Fanney Ólafsdóttir tók við formannskeflinu. Hallfríður Ósk Aðalsteinsdóttir og Oddný Ása Ingjaldsdóttir voru kjörnar í ritnefnd og Guðmunda Bríet Steindórsdóttir kom ný inn í varastjórn.