Erlendur Árnason á Skíðbakka í Austur-Landeyjum verður hluti af þjálfara- og afreksteymi Íslands í undirbúningi fyrir heimsmeistaramót íslenska hestsins 2027.
Mótið fer fram í Rieden í Bæjaralandi í Þýskalandi dagana 27. júlí til 1. ágúst. Erlendur verður járningamaður liðsins, en hann hefur fylgt landsliðinu á síðustu fjórum heimsmeistaramótum. Hann er einn reyndasti keppnis- og kynbótajárningamaður landsins og hefur hann járnað stóran hluta þeirra hrossa sem keppt hafa á HM síðustu ár, sem nýtist vel því hann þekkir hestana og þarfir þeirra.
Frá þessu er greint á vef LH.
Hlutverk Erlends á mótum nær langt út fyrir járningar. Hann sér um fóta- og búnaðarskoðun hestanna og tekur þannig álagið af knöpunum, en reynsla hans sem dómari kemur þar að góðum notum. Auk þess leysir hann ýmis verkefni í kringum liðið og hleypur í skarðið þegar eitthvað kemur upp á. Reynsla járningamanns getur skipt sköpum á ögurstundu, til dæmis þegar skeifa fer undan hesti rétt fyrir keppni og hver mínúta skiptir máli.
Það er ljóst að íslenska landsliðið ætlar sér stóra hluti á HM í Rieden og það styrkir þá vegferð að hafa einn reynslumesta járningamann landsins með í för.