Kylfingurinn Heiðrún Anna Hlynsdóttir, Golfklúbbi Selfoss og motocrossmaðurinn Eric Máni Guðmundsson, Umf. Selfoss, voru valin íþróttafólk Héraðssambandsins Skarphéðins árið 2025.
Viðurkenningarnar voru veittar á Héraðsþingi HSK á Borg í Grímsnesi í síðustu viku.
Heiðrún Anna varð Íslandsmeistari kvenna í holukeppni 2025, stigameistari Golfsambands Íslands og sigraði á fjórum af sex stórmótum á mótaröð þeirra bestu hjá GSÍ. Hún lék með A landsliði kvenna á Evrópumótinu í golfi og er efst íslenskra kvenna á heimslista áhugamanna. Heiðrún spilaði með kvennaliði GOS í 1. deild kvenna á Íslandsmóti golfklúbba þar sem hún sigraði alla sína leiki. Heiðrún Anna er einnig öflug þegar kemur að félagsstarfinu, hún þjálfar börn, unglinga og nýliða hjá GOS og situr einnig í nefndum á vegum klúbbsins.
Eric Máni skipar sér í röð þeirra bestu á Íslandi í motocross. Hann er metnaðarfullur og stundar sportið af miklum krafti og æfir bæði hérlendis og erlendis. Hann varð Íslandsmeistari í MX2 árið 2025 ásamt því að lenda í 2. sæti í enduro 14-19 ára. Eric Máni keppti fyrir hönd Íslands í Motocross of Nations í Bandaríkjunum, sem er stærsta liðakeppni í heimi. Eric Máni hefur þjálfað yngstu iðkendurna hjá motocrossdeild Umf. Selfoss síðustu ár. Hann var í lok árs valinn motocrossmaður ársins 2025 hjá Mótorhjóla- og snjósleðaíþróttasambandi Íslands.