Selfoss tapaði stórt þegar liðið heimsótti Fram í úrvalsdeild kvenna í handbolta í kvöld. Lokatölur í Úlfarsárdalnum voru 34-19.
Leikurinn var jafn fyrstu tíu mínúturnar en þá settu Framkonur í gírinn og náðu fimm marka forskoti sem jókst svo enn frekar þegar leið að hálfleik. Staðan var 15-9 í leikhléi.
Fram byrjaði seinni hálfleikinn af krafti og náði fljótlega tíu marka forskoti og þegar rúmar tíu mínútur voru eftir var staðan orðin 28-14. Selfoss átti erfitt uppdráttar, bæði í vörn og sókn og Fram jók forskotið enn frekar undir lokin.
Marte Syverud var markahæst Selfyssinga með 4 mörk, Hulda Hrönn Bragadóttir og Adela Jóhannsdóttir skoruðu 3, Sylvía Bjarnadóttir og Arna Kristín Einarsdóttir 2, Hulda Dís Þrastardóttir 2/2 og þær Eva Lind Tyrfingsdóttir, Emelía Ósk Aðalsteinsdóttir og Inga Sól Björnsdóttir skoruðu 1 mark hver.
Selma Jóhannsdóttir varði 6 skot í marki Selfoss og var með 27% markvörslu og Sara Xiao Reykdal varði 4/1 skot og var með 19% markvörslu.
Selfoss er á botni deildarinnar með 4 stig en Fram er í 3. sæti með 17 stig.