Síðastliðinn sunnudag var undirritaður nýr samstarfssamningur á milli Íþróttafélagsins Hamars og Hveragerðisbæjar til þriggja ára. Heildarverðmæti samningsins er 20,4 milljónir króna.
Samningi þessum er ætlað að efla samstarf bæjaryfirvalda í Hveragerðisbæ og Íþróttafélagsins og tryggja öflugt íþrótta-, forvarna- og tómstundastarf fyrir börn og ungmenni í Hveragerðisbæ.
Áhersla er lögð á mikilvægi þess öfluga starfs sem fer fram innan Íþróttafélagsins Hamars fyrir samfélagið í heild. Til þess að félagið geti ræktað hlutverk sitt styrkir Hveragerðisbær félagið árlega með beinum og óbeinum fjárframlögum auk þess sem félagið tekur að sér fyrir Hveragerðisbæ tiltekin afmörkuð verkefni gegn greiðslu.
Innan Íþróttafélagsins Hamars og í einstökum deildum er unnið öflugt sjálfboðaliðsstarf og framlag sjálfboðaliða ómetanlegt fyrir félagið, einstakar deildir og samfélagið allt. Vegna umfangsmikils starfs á vegum félagsins og einstakra deilda er nauðsynlegt fyrir félagið að fá rekstrarstyrk vegna rekstrar félagsins og deilda. Ráðstöfun rekstrarstyrkja er í höndum aðalstjórnar félagsins.