Emelía Óskarsdóttir hefur leikið sinn síðasta leik fyrir Selfoss í Bestu deldinni í sumar en sænska liðið Kristianstad hefur kallað hana til baka úr láni.
„Já, þetta var síðasti leikurinn hennar fyrir Selfoss – í bili, hver veit hvað gerist síðar. Núna er lánstíminn hennar búinn. Við vorum að vonast til þess að geta haldið henni út ágúst en mér heyrist að Kristianstad sé í einhverri smá endurbyggingu og það er einhver hreyfing á leikmönnum þar, þannig að þau vildu fá hana til baka núna,“ sagði Björn Sigurbjörnsson, þjálfari Selfoss, í samtali við sunnlenska.is eftir sigurleikinn gegn Keflavík í gær, þar sem Emelía var besti maður vallarins.
„Amanda Andradóttir er farin í Val og það gengur auðvitað ekki fyrir Kristianstad að vera með Íslendingalaust lið, þannig að þau þurftu að kalla í Emelíu til baka,“ sagði Björn og hló.
Emelía, sem er 17 ára gömul, spilaði tólf leiki fyrir Selfoss í deild og bikar í sumar og skoraði í þeim tvö mörk.