Selfoss vann öruggan sigur á Árbæ í B-deild deildarbikars karla í knattspyrnu á Selfossvelli í kvöld, 4-1.
Fyrri hálfleikur var tíðindalítill en Elvar Orri Sigurbjörnsson kom Selfyssingum yfir með marki úr vítaspyrnu á 34. mínútu. Staðan var 1-0 í hálfleik.
Í seinni hálfleiknum fóru hlutirnir að gerast. Brynjar Bergsson kom Selfyssingum í 2-0 þegar fimm mínútur voru liðnar, en fimm mínútum síðar minnkuðu Árbæingar muninn í 2-1.
Elvar Orri var aftur á ferðinni á 63. mínútu og á 84. mínútu rak Guðmundur Stefánsson svo smiðshöggið á 4-1 sigur þeirra vínrauðu.
Selfoss er á toppi riðils 2 í B-deildinni með 6 stig en Árbær er á botninum, án stiga.