Hamar og HK áttust við í Hveragerði í dag í fyrsta leik leiðanna í einvíginu um Íslandsmeistaratitilinn í blaki karla. Það varð fljótt ljóst að HK ætlaði að gera allt sem í þeirra valdi stóð til að koma í veg fyrir að Hamar vinni enn einn titilinn í ár og endaði þetta í maraþon leik þar sem aldrei var dauð stund.
HK vann fyrstu hrinuna 28-30 eftir upphækkun og gestirnir höfðu frumkvæðið áfram inn í aðra hrinu. Hamar hleypti þeim reyndar aldrei langt framúr og Hvergerðingar jöfnuðu að lokum 23-23 og náðu að knýja fram sigur í hrinunni, 27-25 eftir upphækkun.
Þriðja hrina var jöfn framan af en í stöðunni 10-10 skreið Hamar fram úr og vann hrinuna 25-16, sem var langt frá því að vera jafn þægilegt og tölurnar gefa til kynna því barist var fyrir hverju stigi. Fjórða og síðasta hrinan gaf fyrstu tveimur svo ekkert eftir. Litlu munaði á liðunum alla hrinuna þar til Hamar náði forystu 18-17. Þeir litu ekki til baka eftir það og sigruðu hrinuna 25-21 og leikinn þar með 3-1.
Næsti leikur liðanna er á mánudaginn í Digranesi klukkan 19.