Leikmaður kvennaliðs Selfoss í knattspyrnu sem fór í sýnatöku vegna COVID-19 í dag er ekki smitaður af kórónuveirunni. Niðurstaða sýnisins var neikvæð.
Sunnlenska.is greindi frá því fyrr í dag að æfingu kvennaliðsins í kvöld og leik hjá 2. flokki kvenna hafi verið frestað vegna gruns um COVID-19 smit hjá leikmanni meistaraflokks.
Alfreð Elías Jóhannsson, þjálfari kvennaliðs Selfoss, staðfesti í samtali við sunnlenska.is að niðurstaða sýnatökunnar hjá leikmanninum hafi verið neikvæð.
Hins vegar eru tveir leikmenn kvennaliðs Selfoss komnir í sóttkví eftir að hafa sótt viðburð í Kópavogi um síðustu helgi. Þær verða í sóttkví næstu átta daga og missa því af leik Stjörnunnar og Selfoss í Pepsi Max deildinni á miðvikudagskvöld.