Selfoss tók á móti Kára í 2. deild karla í knattspyrnu í kvöld. Þetta var stórleikur umferðarinnar en liðin eru í 2. og 3. sæti og sigur hefði gefið Selfyssingum gott andrými í toppbaráttunni.
Byrjunin var frábær hjá Selfyssingum en strax á 2. mínútu slapp Frosti Brynjólfsson innfyrir Káravörnina og skoraði. Selfossliðið komst í góðar stöður í kjölfarið og hefði getað bætt við marki en það var ekki fyrr en á 42. mínútu að Bjarki Flóvent Ásgeirsson tvöfaldaði forskotið með góðu skoti úr teignum. Káramenn áttu hins vegar lokaorðið í fyrri hálfleik og þeir minnkuðu muninn í 2-1 uppúr hornspyrnu á lokamínútunni.
Kári mætti miklu sprækari inn í seinni hálfleikinn og Selfyssingar áttu í vök að verjast á köflum. Jöfnunarmarkið lá í loftinu og það kom á 70. mínútu – aftur eftir hornspyrnu. Bæði lið gerðu sig líkleg í kjölfarið en síðustu tíu mínúturnar sóttu Selfyssingar hart að Káravörninni, sem stóðst áhlaupið og úrslit leiksins urðu 2-2.
Staðan í toppbaráttunni er því óbreytt, Selfoss hefur þriggja stiga forskot á Kára með 33 stig í 2. sæti en Kári er með 30 stig í 3. sæti.