Sl. sunnudag var bikarkeppni 15 ára og yngri í frjálsum íþróttum haldin í Kaplakrika í Hafnarfirði. HSK/Selfoss sendi tvö lið til þátttöku, 14 manna A-lið og 15 manna B-lið keppenda fædda 2002-2001.
A-liðið endaði í 3. sæti í heildarstigakeppninni eftir mikla spennu í síðustu greinunum, með 111,5 stig aðeins 1 ½ stigi á eftir UFA sem varð í 2. sæti og 9 stigum á eftir 1. sætinu. B-liðið endaði í 5. sæti, 4 stigum á eftir 3. sætinu. Piltaliðin urðu í 2. og 4. sæti og stúlknaliðin í 3. og 5. sæti. Þessi árangur er frábær, ekki síst vegna þess hve liðið er ungt og flestir í liðinu eiga því eitt ár eftir í þessum flokki.
Keppendur HSK/Selfoss unnu þrenn gullverðlaun. Kolbeinn Loftsson sigraði í hástökki með 1,66 m, Sindri Ingvarsson í kúluvarpi með 12,23 m og Ragnheiður Guðjónsdóttir í kúluvarpi með 11,36 m.
Hákon Birkir Grétarsson setti landsmet í 60 m grind í flokki 14 ára er hann hljóp á 8,93 sek og er það um leið HSK met í flokki 14 ára.
Fimm önnur HSK met voru slegin á mótinu: Dagur Fannar Einarsson bætti eigið met í 14 og 15 ára flokki í 400 m hlaupi á 58,14 sek en Jónas Grétarsson hljóp einnig undir gamla metinu á 59,67 sek. Heiðar Óli Guðmundsson setti met í 14 ára flokki í 1500 m hlaupi á 4:58,88 mín og svo setti piltasveitin met í 15 ára flokki í 4×200 m hlaupi á 1:46,83 mín. Bríet Bragadóttir setti met í 14 ára flokki í 400 m hlaupi á 64,59 sek Valgerður Einarsdóttir setti met í 14 ára flokki í 1500 m hlaupi á 5:32,94 mín.