Laugavegshlaupið milli Landmannalauga og Þórsmerkur var haldið í þrítugasta sinn síðastliðinn laugardag við nokkuð góðar aðstæður.
Eitt héraðsmet var slegið í hlaupinu en Sveinn Skúli Jónsson, Umf. Heklu, kom sjöundi í mark í flokki 18-29 ára á tímanum 5:38,35 klst. Hann bætti þar eigið HSK-met í flokki 20-22 ára um 10,04 mínútur en þetta er í fjórða sinn sem Sveinn Skúli tekur þátt í hlaupinu.
Yfir 700 hlauparar tóku þátt í hlaupinu og að venju var þar fjöldi sunnlenskra hlaupara á ferðinni. Hlaupinu lauk í bongóblíðu í Húsadal en aðstæður á leiðinni voru almennt mjög góðar og fjölmargir áhorfendur biðu í Þórsmörk og tóku þar á móti hlaupurunum.