Skotíþróttafélagið Skyttur átti sex keppendur á landsmóti í loftskammbyssu sem haldið var í Digranesi síðastliðinn laugardag. Aldrei hefur skotfélagið Skyttur átt fleiri keppendur á móti. Fjórir keppendur voru á sínu fyrsta móti og keppti félagið jafnframt í fyrsta skipti í liðakeppni.
Elín Kristín Ellertsdóttir fékk silfur í stúlknaflokki og skaut 428 stig. Hún var að keppa á sínu fyrsta móti með glæsilegum árangri. Elín byrjaði að æfa loftbyssu í unglingaflokki í febrúar.
Óðinn Magnússon fékk gull í drengjaflokki og skaut 504 stig og náði þeim árangri að skjóta sig upp fyrir 500 stig í móti. Þetta er gríðarlega góður árangur. Óðinn hefur æft loftskammbyssu síðan haustið 2021.
Í karlaflokki kepptu Emil Kárason (477), Magnús Ragnarsson (528), Einar Þór Jóhannsson (429) og Viggó Guðlaugsson (461) og voru þeir flestir að keppa á sínu fyrsta móti.
Silfur í liðakeppni
A-lið SKS í karlaflokki skipuðu Emil Kárason, Magnús Ragnarsson og Óðinn Magnússon og var samanlagður stigafjöldi 1509 stig sem tryggði liðinu silfur á mótinu en fjögur lið voru skráð í karlaflokki.
„Við erum mjög stolt af árangi félagsins á þessu móti og sérstaklega unglingunum sem eiga framtíðina fyrir sér,“ segir Magnús Ragnarsson, formaður Skytta.
„Æfingar eru tvisvar í viku hjá okkur núna, á mánudögum og fimmtudögum. Við erum með þrjár æfingar á mánudögum í þremur flokkum og svo tvær á fimmtudögum hjá tveimur flokkum ásamt opnum æfingum á kvöldin sömu daga fyrir fullorðna,“ bætir hann við.