Handknattleiksdeild Umf. Selfoss hefur samið við Einar Sverrisson um að ganga inn í þjálfarateymi meistaraflokks karla fyrir komandi tímabil. Hann verður aðstoðarþjálfari liðsins, Erni Þrastarsyni til halds og trausts.
Einar Sverris þarf vart að kynna fyrir sunnlensku handbolta áhugafólki. Hann er leikjahæsti og markahæsti leikmaður Selfoss frá upphafi en hann lék 272 leiki og skoraði í þeim 1.204 mörk.
„Það er ómetanlegt fyrir ungt lið Selfoss að fá þennan reynslubolta til að miðla sinni þekkingu,“ segir í tilkynningu frá handknattleiksdeildinni, þar sem Einar er boðinn hjartanlega velkominn í teymið og því hnýtt við að vænst sé mikils af hans innleggi.