Stórskyttan Einar Sverrisson hefur skrifað undir nýjan tveggja ára samning við handknattleiksdeild Selfoss.
Einar er uppalinn Selfyssingur og hefur leikið stærstan hluta ferils síns hjá uppeldisfélaginu. Hann hélt í stutt ævintýri til Vestmannaeyja þar sem hann lék tvö tímabil árin 2016-2018 og sneri svo heim þegar Selfyssingar unnu sér aftur sæti í deild þeirra bestu.
Í tilkynningu frá Selfyssingum segir að það sé virkilega gleðilegt að Einar ætli að taka slaginn áfram með Selfyssingum.
„Hann er gríðarlega leikreyndur og raunar einn markahæsti leikmaður meistaraflokks karla frá upphafi. Það er ómetanlegt fyrir ungu leikmennina sem eru að fóta sig í deild þeirra bestu að hafa leiðtoga á borð við Einar sér við hlið,“ segir í tilkynningu Selfyssinga.