Egill vann brons í Hollandi

Júdómennirnir Egill Blöndal og Hrafn Arnarsson, Umf. Selfoss, héldu til Hollands í lok nóvember þar sem þeir tóku þátt í International Den Helder Open 2016 ásamt Selfyssingnum Úlfi Þór Böðvarssyni sem nú er búsettur í Danmörku.

Egill náði þriðja sæti í sínum flokki en hefði með smá heppni í raun átt að vinna mótið þar sem hann var augljóslega sterkasti keppandinn. Sjá mátti að nokkuð er um liðið síðan hann tók þátt í síðasta móti en Egill var frá æfingum og keppni í lok sumars vegna veikinda. Hann er hins vegar óðum að ná sér aftur á strik og má vænta mikils af honum á komandi mánuðum.

Hrafn stóð sig afar vel og vann tvær viðureignir mjög sannfærandi og sést að þar er á ferðinni mikið efni og vænta má mikils af honum í framtíðinni. Hrafn og Úlfur höfnuðu báðir í fimmta sæti í sínum flokki á mótinu sem verður að teljast vel viðunandi árangur.