Egill Blöndal, Umf. Selfoss, vann til silfurverðlauna í -90 kg flokki í júdó á Smáþjóðaleikunum í Svartfjallalandi í dag.
Egill beið lægri hlut í spennandi úrslitaglímu gegn Raphael Schwendinger frá Liechtenstein. Egill var sókndjarfur alla glímuna og leiddi hana en þegar 24 sekúndur voru eftir jafnaði andstæðingur hans og fór glíman í gullskor. Þar hafði Schwendinger betur og því voru það silfurverðlaunin sem féllu til Egils að þessu sinni.
Þór Davíðsson stóð sig sömuleiðis vel og vann til bronsverðlauna í -100 kg flokki.
Nú verður hvílt í einn dag og svo keppt í liðakeppni í júdó á fimmtudaginn.