Frjálsíþróttamaðurinn Egill Atlason Waagfjörð var útnefndur íþróttamaður ársins hjá Ungmennafélaginu Kötlu í Mýrdal en aðalfundur félagsins fór fram á Hótel Kötlu síðastliðinn þriðjudag.
Auk Egils var motocrossmaðurinn Andri Berg Jóhannsson tilnefndur til titilsins íþróttamaður ársins.
Freyja Dögg Atladóttir Waagfjörð var kjörin efnilegasti íþróttamaðurinn og Þórdís Erla Ólafsdóttir Dýrfjörð hlaut fyrirmyndarbikarinn fyrir sitt ómetanlega framlag til félagsins.
Á fundinum voru einnig veitt hvatningarverðlaun en þau hlutu Sigrún Ólafía Pálsdóttir, Þorkell Skorri Jóhannsson, Grétar Logi Kristjánsson, Kristmundur Rafn Guðmundsson og Almar Darri Richardt Sveinsson.
Ný stjórn og nýr samningur við Mýrdalshrepp
Ný stjórn var kosin á fundinum. Formaður félagsins er Sara Lind Kristinsdóttir en með henni í stjórn eru Óðinn Gíslason, Kristrún Friðsemd Sveinsdóttir, Guðlaug Lilja Sævarsdóttir og Marton Agustson. Í varastjórn eru Hlífar Arnar Hlífarsson og Eva María Ólafsdóttir Kolbeins. Í kaffihléi undirritaði Mýrdalshreppur nýjan samstarfssamning við Umf. Kötlu en þau Sara Lind og Einar Freyr Elínarson, sveitarstjóri, undirrituðu samninginn.