Egill Blöndal, Umf. Selfoss, varð tvöfaldur Íslandsmeistari þegar Íslandsmótið í júdó var haldið í Grindavík um síðustu helgi.
Egill vann allar sínar glímur á mótinu og tók gull bæði í +100 kg flokki og í opna flokknum. Titlarnir tveir sem bætast í safnið hjá honum þýða að Egill hefur nú unnið alls 11 Íslandsmeistaratitla á ferlinum.
Sunnlendingar unnu þrefaldan sigur í -63 kg flokki kvenna en Agla Ólafsdóttir varð Íslandsmeistari, Sara Nugig Ingólfsdóttir í 2. sæti og Ella Rogge í 3. sæti. Allar eru þær í Judofélagi Suðurlands. Agla og Sara bættu við bronsverðlaunum í opna flokknum og í sveitakeppninni skipuðu þær sveit Judafélags Suðurlands sem varð í 2. sæti.
Fannar Þór Júlíusson, Umf. Selfoss, tryggði sér silfurverðlaun í -73 kg flokki karla. Árangur Fannars er einkar glæsilegur í ljósi þess að hann er aðeins 17 ára gamall, og voru þetta hans fyrstu verðlaun á Íslandsmeistaramóti seniora.

